10 Kasım 2009 Salı

Jiyanê Binpê Dikim


bi tenê ev mabû min nekiribû
berhingarî li jiyana bêgav
yek peyvek jî tune
me jê safî bike
bi qasî gundên şewitandî em li nava ariyan in


îhtimal û bilindbînî
şêweyekî xwekuştinê ye evîn
ne rewa ye betanê dewletê
qesasên ku hatine sivirandin
wexteke newext mirov dikujin


pisîk giş digirîn
li ser rewşa min a xwekuştinê
li hemberî siyanûrê têk diçe reh
îhtimal. binpêkirin. xezeb û îhtilal
min jiyan li van çar peyvan veşart


striyê gula dawî yê ku hildibe
ji guliyê xwe, dilê min xwîn dike. îhtimal
xezeb. îhtilal û dewlet
jiyanên bêserûşûnbûyî dipêçin
dora esmanê lewitandî


lêlê evîn! li ser xatirê sûretê te yê xesandî
min şûr kişand li gilêneya di dilê xwe de
min binpê kir jiyan
jiyan xeniqand bi tenêtiya xwe
parçeparçe bombeya di hişê min de


1997- Amed

Bayram BALCI


Kürtçe çeviri: Kawa Nemir

Hiç yorum yok:

Yorum Gönder